港男港女乜乜乜

最近香港政府提出要海洋公園轉型,主題公園「主題」不再,發展將會如何尚且不談。不過其主席劉鳴煒卻再一次成為熱話,作為人所共知,10歲生日收十萬現金日日「數銀紙」的「二世祖」,海洋公園一仗不意外地成為「二世祖」輕鬆整死一盤好生意嘅代表作

不過劉鳴煒管生意唔掂,溝女卻有一手,多年來身邊女伴換畫無數,數月前出現的最新一位女伴 [1] 更是邂逅自五年前的節目《我係乜乜乜》 [2],不禁令人敬佩劉鳴煒的技能點沒有受制於父輩的商界出身,全都點在享樂一欄,創意十足。

下文為五年前刊於《輔仁文誌》的文章,五年後再看,好像差別不大…(下文曾略作修改。)

[1] https://hk.appledaily.com/entertainment/20201002/DD74V2SMVZGTRIOSKHFHAGQO2M/

[2] 《我係乜乜乜》為2015年底播映的香港電台節目,透過各項網上測試、社會實驗和群眾參與,探討網絡熱烈討論的社會現象。其中一集「我係男神/女神?」以劉鳴煒及游學修作例子,先不公開身份,單純透過對答供參加者選擇交往對象,然後再公開身份,以觀察參加者態度的轉變。


「喂喂喂,你有無睇港台果套《我係乜乜乜》呀?男神果集呢,有劉鳴煒果集呢,又有人出嚟話入面轉呔嘅女仔係港女啦!」

「咪係囉,唔通一定要揀唔有錢唔靚仔無家底背景嘅先叫好女人咩?」

「要靠批評港女去掩蓋自己自卑嘅男人,真係good fucking luck」

要評價到底「港女」、「港男」誰對誰錯,一定要睇曬整個原片,我舉個例:

留意下有位短髮女仔,未知邊個打邊個果時,單從對答嘅過程,就覺得唔鐘意劉鳴煒太過老練(影片3分09秒),但見樣後又轉口話鐘意劉鳴煒成熟穩重,仲要鐘意劉鳴煒對眼(影片8分24秒)……媽!我好亂呀!

未見樣前就已經堅持選擇劉鳴煒嘅兩位女士,我絕對尊重,因為佢哋的確從對答中了解到邊一個適合自己;但見樣後,十秒唔洗就轉曬呔嘅女士,我真係好奇,佢哋內心真正選擇伴侶嘅理由,真係唔係為靚仔同錢?

唔好同我講佢哋唔知兩人之間嘅財力差距,對答過程游學修好明確已經講到無辦法帶比另一半錢銀上嘅滿足!

「To be fair,男士都會咁樣考慮女士。」

劉鳴煒無講錯,你哋都無睇錯,男人比女人更睇重對方嘅成個「package」,樣貌身材性格興趣家底學歷,仲要順次序去睇,但我想知,真心請救,你有見過幾多男人口是心非,口講一套行動一套?

(唔好同我用「睇日本AV然後鬧女人食洋腸」做理由,影片選擇同伴侶選擇從根本上無可能對比到,AV選擇只有幾多?伴侶呢?)

「咁揀男朋友好似揀鞋咁,幾靚幾貴都無用㗎,唔啱自己就點都無用啦~~」

呢位女士(or女仔)「講」得啱呀,但又有幾多女性,果把量度啱唔啱自己嘅尺,量度單位上面係無「靚仔」同「有錢」呢兩項?我信有好多嘅,但唔包括大部分參加呢個節目嘅女性囉。就連已經結過婚又離過婚,人生「閱」女無數嘅劉鳴煒,佢自己都講得出:

「港女真係好現實」

「擺到明係遊戲,大家笑下轉會又有咩所謂」

如果真係有咁嘅心態,當我哋「笑佢哋轉會」果時,又點解要批評我哋?都係笑下姐~~(只係討論得嚴肅好多)

大家會有批評, 因為大家都知呢一個係一個電視節目,會一直公開同會留傳一世,入面嘅人講錯一句,大家就可以無限loop重複又重複去談論同評價,得閒無事又翻炒(按:的確係事實,5年後嘅今日我又囉翻出嚟講啦~~)。我相信上節目嘅人,已經有呢個心理準備,最終都係決定咁樣講。咁,仲算唔算係遊戲,而唔係現實?除非,佢哋真係咁鐘意公開自毀形象啦。

有好多批評我哋鬧人港女,都會借勢評擊咁樣係父權行為,去指責我哋對女性嘅行為同思想「指指點點」,例如:男友唔比你有男仔朋友 / 唔準化妝 / 唔準著得sexy / 人工唔可以高過佢 / 唔可以去clubbing / 中環飲野就係one night stand……

同時,女士們都要求緊公平對待佢哋,如:「唔明點解啲香港男人成日話要搵個女人肯一齊捱」(姐係女性唔應該要係有男朋友嘅情況下去捱?)

但女士們,你哋都一樣用緊父權社會嘅心態去評價男性!

一個好好例子,而家好多女仔會怪男朋友唔送自己返屋企,話「以前阿媽果個年代,男仔約女仔出行要管接管送」,麻煩解釋一下送女仔回家點解係必要?點解唔係公平地男女雙方去一個中間點作分別,或者輪流互送對方?你哋自貶為需要男人送嘅人,然後就批評男人視你為弱者?

仲有唔少女仔好著重男朋友要有上進心。上進心?男人嘅上進心,除左用嚟賺錢賺地位賺名聲,仲有咩用?上進心係男性嘅專利,女人唔需要?而且,年中到底幾多男人俾「上進心」呢三個字呃咗……

當所謂嘅「上進」係建立於錢嘅多少,為咗錢,為咗滿足「上進」嘅條件就要放棄一切,咁我同與銀紙為伴有咩分別?有嘅,銀紙唔會出聲話你唔上進囉。

最後,翻返去一開始果句「又有人話港女」,終歸嘅原因只係你哋覺得「因為劉鳴煒呢個筍盤嘅出現」而令港男嬲,毫無理性分析,但你哋評擊男人嘅方法,就同你哋自己口中「是是但但就被激嬲話人哋係港女」哋「港男」一樣,都係不理性的!