香港無軍事?少年你真係太年輕啦

「喂你知唔知呢,你住緊果條邨/讀果間學校,幾廿年前打仗嗰時係亂葬崗嚟㗎。」

唔少人細個果時,唔多唔少都聽過呢類鬼故,十之有九都話關打仗事。但係又有無諗過,香港嘅軍事除咗呢啲之外,到底仲有咩故仔呢?

同朋友討論開香港有無軍事話題,朋友嘅第一反應通常都係:「乜香港有軍隊嘅咩?」。呢句應該都代表到唔少後生一代香港人嘅諗法,現今唔少香港人除咗知道香港有幾個軍營、筲箕灣有個「海防博物館」、二戰香港打過仗之外,再深入少少嘅或者都只係聽過添馬以前係軍港、城門有條防線、睇過英軍嘅電視廣告,查實係未必知香港軍事仲有乜野。

的確,香港之前一直處於相對和平嘅地區,英軍又已經離開香港廿幾年,本土軍事話題可以話係近乎零。亦因為香港太「和平」,「軍事」置於香港嘅作用同重要程度、真係有如觀音兵置於女神下既情況 — 可有可無,以致好多人覺得軍事從來都唔關香港人事一樣:「英國喺度果時,香港軍事就係英國佬嘅事;英國走咗之後,就變成中國人嘅事。」

或者因為咁,曾經有一段時間,本地唔少歷史研究都著重於香港經濟同政治,相對忽視軍事部分。不過近年有所改變,多位研究香港本土歷史嘅專家,尤其如鄺智文、蔡耀倫等軍事史研究學者,重新強調軍事係香港歷史當中必要組成部分,更進而立論,指出部分香港嘅社會發展、社會建設同人文發展,都有受香港軍事發展所影響,即使到今日,都仲見得到有唔少影響到而家,好似街名、地名,西營盤就係一個幾突出嘅例子。

重拾返遺忘咗嘅香港歷史,腦入面叮一聲,好似明白到香港意識就係靠一點一滴、用真實嘅歷史建構,諗返起以前睇教科書當真相嘅日子,真係覺得自己太年輕喇,唔知大家又係咪好似我咁呢?

(原文於2020年6月9日刊於 The Blueprint Magazine)